ဘာရယ်မဟုတ် အင်တာနက်ထဲ လျှောက်သွားနေရင်းနဲ့ အလံတွေအကြောင်းရောက်သွားတယ်။ အလံဆိုတာက ဟိန္ဒူ ဘာသာစကားပါ။ မြန်မာမှာတော့ အရင်တုန်းက အလံ လို့သုံးတာ မကြားဖူးဘူး။ တံခွန်၊ ကုက္ကား ဆိုတာတွေပဲရှိတယ်။ နောက်ပိုင်း အိန္ဒိယလူမျိုးတွေ ရောက်လာတော့မှပဲ သူတို့စကားတွေလဲ မြန်မာစာထဲ ရောလို့ ၀င်လာတော့ မဆလာ၊ အာလူး၊ ဂေါ်ဖီ၊ ပလာတာ စတာတွေနဲ့အတူ အလံ ဆိုတာလဲ အသုံးတွင်ကျယ်လာပါတယ်။ အင်တာနက်ထဲ မြန်မာအလံတွေအကြောင်း ရှာမိတော့ အစောဆုံး အလံ အနေနဲ့ ခရစ်သက္ကရာဇ် ၁၅၀၀ လောက်က အသုံးပြုတဲ့အလံ လို့ ယူဆရတဲ့ ဟင်္သာအလံ ကိုတွေ့မိပါတယ်။
အစိမ်းအောက်ခံမှာ အ၀ါရောင် ဟင်္သာရုပ်နဲ့ အလံဟာ ဟံသာဝတီ နေပြည်တော်မှာ အသုံးပြုတဲ့ အလံဖြစ်မယ်လို့ ခန့်မှန်းမိပါတယ်။ သူ့ထက် နည်းနည်း နောက်ကျပြီး အသုံးပြုတာကတော့ မြန်မာ စစ်တပ်တွေမှာ ရှေ့ဆုံးက ချီတဲ့ သူရဲကြီး တံခွန် ဆိုတာပါပဲ။ ကြက်လျှာစွန်း ၃ ခုနဲ့ အလယ်မှာ န၀ရတ်ကိုးပါး စီချယ်ထားတဲ့ သူရဲကြီးတံခွန်ဟာ သူရဲကောင်းတို့ အမှတ်အသား လို့ သိရပါတယ်။
နောက် တံခွန်တစ်ခုကတော့ မင်းတုန်းမင်းရဲ့တပ်များ စစ်ချီရာမှာ သုံးတဲ့ တံခွန်လို့ ဆိုပါတယ်။ ကျွန်တော်တော့ အတိအကျ မှတ်တမ်းနဲ့ မမြင်ဖူးပါ။ ကြက်လျှာစွန်း ၃ ခုပါ အလံမှာ အလယ်က အနက်ရောင် အပေါင်းသင်္ကေတ နဲ့ ဖြစ်ပါတယ်တဲ့။
ကုန်းဘောင်မင်းဆက်မှာ အသုံးပြုခဲ့တယ်လို့ သေသေချာချာ ပြောနိုင်တဲ့ အလံတစ်ခုကတော့ ဒေါင်းအလံပဲဖြစ်ပါတယ်။ ဒေါင်းအလံကို ပုံစံ အတော်များများနဲ့ အသုံးပြုခဲ့ကြပါတယ်။ အခု ဒေါင်းအလံကတော့ မင်းခမ်းမင်းနားများမှာသုံးတဲ့ အဖြူရောင် ပိုးသားအောက်ခံမှာ အနီရောင် ချည်ထိုးဒေါင်းရုပ်ဖော်ထားတဲ့ အလံပါ။ တံခွန်ပုံစံ ကြက်လျှာ အနားသတ်မဟုတ်ပဲနဲ့ လေးထောင့်ပုံစံ အလံဖြစ်ပါတယ်။
အဲဒီကတည်းက စလို့ အမြီးဖြန့်ပြီးကနေတဲ့ ဒေါင်းဟာ မြန်မာ့အမှတ်တံဆိပ် ဖြစ်လာခဲ့ပါတယ်။ ဒေါင်းဟာ ကုန်းဘောင်မင်းဆက် မြန်မာဘုရင်တွေရဲ့ အမှတ်တံဆိပ် ဖြစ်ခဲ့ပြီး ဒေါင်းတံဆိပ် ဒင်္ဂါး၊ ဒေါင်းအလံ စသည်ဖြင့် ဘုရင်တို့ရဲ့ အမှတ်အသားကိုပြတဲ့နေရာမှာ ဒေါင်းရုပ်ကို အသုံးပြုလာပါတယ်။ အင်္ဂလိပ် ကိုလိုနီအစိုးရ မြန်မာနိုင်ငံကို သိမ်းပိုက်ပြီး နောက်ပိုင်းမှာတောင်မှ မြန်မာနိုင်ငံရဲ့ ကိုယ်စားပြုအလံဟာ ယူနီယံဂျက် အလံနဲ့ ဒေါင်းတံဆိပ် ပေါင်းစပ်ထားတဲ့ အလံ ဖြစ်လာခဲ့ပါတယ်။
ဒီ အပြာရောင်အောက်ခံမှာ ဒေါင်းတံဆိပ်နဲ့ ယူနီယံဂျက် အလံဟာ ဒိုင်အာခီ အုပ်ချုပ်ရေး ပေးတဲ့အချိန်က စလို့ မြန်မာအစိုးရရဲ့ အလံအနေနဲ့ အသုံးပြုခဲ့တာဖြစ်ပါတယ်။ အင်္ဂလိပ်ကို တော်လှန်ခဲ့တဲ့ မြန်မာလွတ်လပ်ရေးတပ်မတော် (BIA) ကလည်း ၃ ရောင်ချယ် ဒေါင်းအလံကိုပဲ အသုံးပြုခဲ့ပြန်ပါတယ်။
ဂျပန်ကို တော်လှန်ခဲ့တဲ့ မြန်မာ့တပ်မတော်ကတော့ အနီအောက်ခံမှာ အဖြူရောင် ကြယ်တစ်ပွင့်ပါတဲ့ တော်လှန်ရေးအလံကို အသုံးပြုလာပါတယ်။
ဂျပန် တော်လှန်ရေးပြီိးလို့ အင်္ဂလိပ် အစိုးရ ပြန်လာတဲ့အချိန်မှာတော့ ယူနီယံဂျက် ဒေါင်းအလံကိုပဲ ဆက်လက် အသုံးပြုခဲ့ပါတယ်။ ဘုရင်ခံအတွက် သီးသန့် အမှတ်တံဆိပ် အနေနဲ့ ယူနီယံဂျက်ရဲ့ အလယ်တည့်တည့်မှာ ဒေါင်းရုပ်ပါတဲ့ အလံတစ်ခု တီထွင် အသုံးပြုခဲ့ပါတယ်။
မြန်မာနိုင်ငံ လွတ်လပ်ရေး ရပြီးတဲ့အခါမှာတော့ ပြည်နယ် ၅ ခုနဲ့ ပြည်မ၊ အေးချမ်းသာယာခြင်း၊ ရဲရင့်ပြတ်သားခြင်း ဆိုတဲ့ အဓိပ္ပါယ်တွေကို ဖော်ဆောင်တဲ့ ကြယ်ဖြူ ၆ ပွင့်နဲ့ ပြည်ထောင်စုအလံတော်ဟာ မြန်မာနိုင်ငံရဲ့ တရားဝင် အမှတ်အသား ဖြစ်လာခဲ့ပါတယ်။
သမ္မတရဲ့ အမှတ်တံဆိပ် အနေနဲ့ကျတော့ လိမ္မော်ရောင် အောက်ခံမှာ ဒေါင်းတံဆိပ်ပါတဲ့ အလံကို အသုံးပြုတယ်လို့ တွေ့ရပါတယ်။
မြန်မာ့ဆိုရှယ်လစ်လမ်းစဉ်ပါတီ အာဏာရလာတဲ့ နောက်ပိုင်းမှာ တိုင်းနဲ့ပြည်နယ် ၁၄ ခု၊ အလုပ်သမား၊ လယ်သမား အင်အားစု၊ အေးချမ်းသာယာခြင်း၊ ရဲရင့်ပြတ်သားခြင်းဆိုတဲ့ အဓိပ္ပါယ်တွေနဲ့ ပြည်ထောင်စု ဆိုရှယ်လစ် သမ္မတ မြန်မာနိုင်ငံတော်ရဲ့ အလံဟာ အနီအောက်ခံနဲ့၊ ဘယ်ဖက် အပေါ်ထောင့်မှာ အပြာရောင်အောက်ခံ၊ စက်သွား၊ စပါးနှံနဲ့ အရွယ်အစားညီ ကြယ်ဖြူ ၁၄လုံးပုံစံ အဖြစ် ပြောင်းလဲ ထွက်ပေါ်လာခဲ့ပါတယ်။
ဒီအလံဟာ အခုလက်ရှိအချိန်အထိ မြန်မာနိုင်ငံတော်ရဲ့ အမှတ်တံဆိပ်အဖြစ် ရပ်တည်နေတဲ့ အလံဖြစ်ပါတယ်။ အခုတော့ ဒီ အလံတော်ကိုလဲ ပြုပြင်ပြောင်းလဲပစ်ဖို့ ညှိနိုင်းတိုင်ပင်နေကြပြန်ပါပြီ။ သုံးရောင်ချယ် အောက်ခံမှာ အဖြူရောင် ကြယ်တစ်ပွင့် ပါမယ်ဆိုတဲ့ အခြေခံ သတ်မှတ်ချက်တစ်ခုကိုတော့ ထုတ်ပြန်ထားပြီး ကျန်တာကတော့ ဘယ်လိုပုံစံဖြစ်မယ်ဆိုတာကို ဆက်လက် ဆွေးနွေးနေကြပါတယ်။ ဒီလောက်ဆိုရင်တော့ မြန်မာ့အလံတွေအကြောင်း အတော်လေး ပြည့်စုံလောက်ပါရဲ့။
3 comments:
ဟေရောင် ငစနေ .. မင်းကွာ.. ခွပ်ဒေါင်း အလံ ကျောင်းသား အလံ ကျတော့ ဘယ်သွားထားခဲ့ သလဲ..
ညံ့ပ။
ရွေအိုရောင်ဒေါင်းပျို
ရွှေအိုရောင် ဒေါင်းပျိုကြီးရေ ... တစ်နေ့နေ့ပေါ့ဗျာ။ ခုတော့ official ဖြစ်တဲ့ အလံတွေပဲ တင်ထားတာဆိုတော့ မပါသေးဘူးပေါ့။ တစ်နေ့နေ့ပေါ့ ....
Thanks for sharing!
Post a Comment